Rafrænt.txt

Varúð: Langur texti framundan. En ef þú átt, rekur eða tengist verslun eða annarri atvinnustarfsemi eða verslar einhverntíman í verslun eða kaupir aðra þjónustu þætti mér vænt um að þú læsir hann. Þú gætir unnið milljón dollara! (það væri þá að vísu ótengt textanum en hann útilokar samt á engan hátt að þú vinnir einhverntíman milljón dollara)

Svo. Jæja. Núna er ég búinn að sitja undanfarna daga og dunda mér við að smíða lesara fyrir innkaupastrimla frá Costco. Til skýringar, þá er "lesarinn" ("parserinn" upp á útlensku) sá hluti Strimils-hugbúnaðarkerfisins sem les texta af strimlum og breytir honum í þessi frábærlega gagnlegu gögn (heh) sem þúsundir íslendinga nota nú daglega í Neytandanum, appi Neytendasamtakanna.

Svona lesarasmíði er tímafrek, villugjörn og leiðinleg. Svo leiðinleg að það blæðir úr eyrunum á mér við tilhugsunina. Ekki að sjálft verkið sé leiðinlegt (forritun er jú eins og við vitum skemmtilegt og gefandi fag) heldur vegna þess að það er óþarft og ég veit ekkert leiðinlegra en að gera óþarfa hluti. Þess vegna ætla ég núna ég í eitt einasta skipti að leyfa mér eitt svona rafrænt öskur, þrátt fyrir að vera annars fremur ró- og jafnlyndur maður:

ÁRIÐ ER 2017. ÞAÐ ER ALGJÖR KLIKKUN AÐ ÉG ÞURFI AÐ SÓA TÍMA MÍNUM OG TAKMARKAÐRI GEÐHEILSU Í AÐ SMÍÐA TÖLVUKERFI TIL AÐ LESA AF PAPPÍR ÚTPRENTUÐ GÖGN ÚR ÖÐRU TÖLVUKERFI.

Ah... Húff. Þetta var gott.

En svo ég haldi mig við efnið þá höfum við hjá Strimlinum undanfarin ár nálgast nokkrar af stærri verslununum á Íslandi til að ræða við þær um útgáfu rafrænna innkaupastrimla. Þær sýna því engan áhuga, og sumar láta jafnvel ekki svo lítið að svara.

Svo. Þetta gengur ekki. Eitthvað þarf að gerast og einhver þarf að stíga fyrstu skrefin til að gera þetta ferli rafrænt. Þar sem verslunin hyggst ekki taka frumkvæðið höfum við hjá Strimlinum nú útfært kerfi til að senda og taka á móti rafrænum innkaupastrimlum.

Öllum verslunum stendur til boða að nota kerfið sér að kostnaðarlausu (þótt auðvitað sé einhver óbeinn kostnaður við innleiðslu — en hann er hverfandi).

Fyrsta útfærsla er einföld: Verslanir sem vilja nýta þjónustuna úthluta hverjum innkaupastrimli einkvæmt númer. Það eina sem notandinn þarf að gera er að slá númer strimilsins inn á vef Neytandans, við köllum þá í tölvukerfi verslunarinnar og sækjum strimilinn. Verslanir sem prenta strimla geta jafnframt prentað strikamerki með númerinu á sína strimla, ef þær gera það lesum við strikamerkið í stað textans og sækjum strimilinn til verslunarinnar.

Við völdum að skilgreina okkar eigið snið fyrir strimilinn og það er opinn "staðall" sem allir mega nýta. Hönnunarforsendan var að rafræni strimillinn sé einfaldur í smíðum. Það eru vissulega til staðlar fyrir rafræna reikninga í dag og við munum auðvitað taka við þeim líka en þeir staðlar eru óþarflega viðamiklir fyrir þarfir okkar, sem og flestra neytenda og verslana.

Hér er dæmi um ímyndaða verslun sem deilir gögnum á IRF-sniði:

Og hér er kóðinn að baki þessu tölvukerfi. Kóðinn telur 150 línur.

Verslunareigendur:
Komið og verið með! Það er frábær þjonusta við viðskiptavini að bjóða upp á rafrænar kvittanir og ég held að þetta muni snarbreyta öllu landslagi í smásölu. Við hjá Strimlinum erum hér að stíga fyrstu skref í átt að einhverju sem við vonum að verði stærra og við erum sveigjanleg og opin fyrir hugmyndum og breytingatillögum. Við viljum ekkert frekar en vinna með ykkur og aðstoðum ykkur glöð við að taka upp kerfið.
Og ekkert fyrirtæki er of smátt. Þvert á móti trúum við því að þessar breytingar muni einmitt hefjast í grasrótinni. Ekki vera feimin við að hafa samband og spjalla við okkur.

Neytendur:
Þetta veltur mikið á ykkur. Þið verðið að biðja um þá þjónustu sem þið viljið. Þegar þið farið út í búð—eruð þið til í að segja við kassann: "Geturðu sent mér rafrænan strimil". Verslunin verður að fá að vita að þörfin sé til staðar.

Meira fljótlega.