gistfile1.txt

នៅថ្ងៃអាទិត្យ ទី៣ ឧសភា អ៊ីស្រាអែលបានអនុម័ត ទិញយន្តហោះចម្បាំង ២គ្រឿងទៀត ពីរដ្ឋាភិបាលអាមេរិក។ នៅក្នុងនោះ យន្តហោះប្រដេញ ប្រភេទ F-35 មួយគ្រឿង ផលិតដោយក្រុមហ៊ុន Lockheed Martin និងមួយគ្រឿងទៀត ប្រភេទ F-15IA ផលិតដោយក្រុមហ៊ុន Boeing។ នេះបើយោងតាមក្រសួងការពារជាតិអ៊ីស្រាអែល។«អ៊ីស្រាអែលគឺខ្លាំងជាងពេលណាទាំងអស់ ហើយអ៊ីស្រាអែលត្រូវតែខ្លាំងជាងសត្រូវជានិច្ច»។ នេះជាប្រសាសន៍របស់នាយករដ្ឋមន្រ្តីអ៊ីស្រាអែល លោក បេនចាមិន នេតាន់យ៉ាហ៊ូ នៅថ្ងៃអាទិត្យ ទី៣ ឧសភា ដោយបានបន្ថែមទៀតថា អ៊ីស្រាអែលត្រូវឈរលើគោលការណ៍សំខាន់ពីរ។ ទី១ ពង្រឹងសមត្ថភាពការពារជាតិ និងទី២ ត្រូវមានឯករាជ្យភាព ក្នុងវិស័យយោធា ដើម្បីអាចឲ្យអ៊ីស្រាអែលក្លាយជាប្រទេសខ្លាំងបាន។  លោក បេនចាមិន នេតាន់យ៉ាហ៊ូ បានសង្កត់ធ្ងន់ថា ការបញ្ជាទិញយន្តហោះចម្បាំងអាមេរិក ទំនើបចុងក្រោយ ប្រភេទ F-35 និង F-15IA នឹងអាចជួយពង្រឹងសមត្ថភាពរបស់កងទ័ពអាកាសអ៊ីស្រាអែល វាយលុកចូលក្នុងដែនអាកាសរបស់អ៊ីរ៉ង់។ នាយករដ្ឋមន្រ្តីអ៊ីស្រាអែលបានបន្តទៀតថា អ៊ីស្រាអែលគ្រោងចំណាយថវិកាការពារជាតិបន្ថែម ចំនួនប្រមាណ ១១៩ពាន់លានដុល្លារ សម្រាប់រយៈពេលដប់ឆ្នាំខាងមុខ។ ថវិកាទាំងអស់នេះនឹងត្រូវចំណាយ ដើម្បីជំរុញផលិតកម្មក្នុងស្រុក មានជាទិ៍ ការផលិតសព្វាវុធទំនើបៗ និងយន្តហោះចម្បាំង ដោយខ្លួនឯង ដើម្បីកាត់បន្ថយការពឹងផ្អែកខ្លាំង លើក្រុមហ៊ុនផលិតសព្វាវុធបរទេស។គួរជ្រាបថា គម្រោងបញ្ជាទិញយន្តហោះចម្បាំង ធ្វើឡើងប៉ុន្មានខែ ក្រោយពីរដ្ឋាភិបាលអ៊ីស្រាអែលបានអនុម័តកញ្ចប់ថវិកាជាតិឆ្នាំ២០២៦ ចំនួនប្រមាណជិត៣០០ពាន់លានដុល្លារ ក្នុងនោះ ៤១ពាន់លានដុល្លារ ចំណាយលើវិស័យការពារជាតិ៕