Samþykktir stofnfundar Pírata á Vestfjörðum

kynning-frambjodenda.md

Ályktun stofnfundar Pírata á Vestfjörðum um kynningu frambjóðenda

Píratar á Vestfjörðum álykta að fela stjórn félagsins að undirbúa kynningarfund fyrir þá sem hafa áhuga á að bjóða sig fram í Norðvesturkjördæmi í nafni Pírata við næstu Alþingiskosningar. Skal samráð haft um skipulag fundarins við aðra hlutaðeigandi aðila, svo sem önnur aðildarfélög í kjördæminu, þingflokk Pírata og framkvæmdaráð.

Stefnt skal að því að fundurinn stuðli að því að veita áhugasömum um framboð innsýn í ferla bæði Pírata og landslaga hvað varðar Alþingiskosningar, auk þess að fara yfir framkvæmd kosningabaráttunnar 2013 og þannig hvers má vænta í baráttunni 2017.

Hafa skal í huga við skipulagningu fundarins að búast má við að frambjóðendur flokksins muni þurfa að leggja umtalsvert á sig, þ.á.m. í beinan kostnað, við kosningabaráttuna. Það er því ekki forgangsatriði að hámarka þátttöku í fundinum á kostnað ítarlegrar umfjöllunar.

stefna-dreifstyring.md

Tillaga að stefnu um aukna dreifstýringu vísað til rafrænnar kosningar

Með tilliti til:

• greinar 6.1 í grunnstefnu Pírata um réttinn til sjálfsákvörðunar
• greinar 6.3 í grunnstefnu Pírata um að draga úr miðstýringu

og hliðsjón af:

• slakri reynslu jaðarsvæða af sameiningu sveitarfélaga og takmörkuðum árangri þeirra við að ná yfirlýstum markmiðum
• yfirlýstum vilja ríkisvaldsins til að ganga enn lengra í sameiningu, meðal annars með sameiningu allra Vestfjarða í eitt sveitarfélag
• takmörkuðum möguleikum sveitarfélaga til að tryggja rekstrargrundvöll sinn
• þeirri staðreynd að ríkisvaldið var lagt á sveitarfélögin með hervaldi
• tilhneigingu íslenska ríkisins frá tilkomu heimastjórnar að draga úr vægi stjórnvaldsstiga annarra en landsstjórnarinnar

álykta Píratar á Vestfjörðum að stefnt skuli að því að:

1. Samræma skuli þau landsvæði sem svæðisskiptar ríkisstofnanir styðjist við. Ráðlagt verði að stuðst sé við þau svæði sem skilgreina landshlutasamtök sveitarfélaga.
2. Settar skuli á fót, með tilfærslu verkefna frá ríki og sveitarfélögum, héraðsstjórnir. Skal héraðsstjórnum fært sjálfstætt fjárveitingarvald.
3. Innan héraðs verði heimilt að afturkalla sameiningar sveitarfélaga.
4. Verði vinna að þessum markmiðum ekki hafin fyrir árslok 2017 skuli Vestfirðir segja sig úr lögum við lýðveldið Ísland.